शुक्लाफाँटा वनहरा शिविरमा बस्दै आएका २७ परिवार र वडा नं १२ का नौ परिवारलाई राहत सामग्री वितरण गरिएको छ । शाखाका कोषाध्यक्ष थिरेन्द्रचन्द्र भट्ट र रेडक्रस उपशाखा झलारीका सभापति शेरबहादुर साउदले संयुक्त रुपमा राहत सामग्री वितरण गरेका हुन् ।
परिवारलाई वितरण गरिएको सामग्रीमा त्रिपाल, कम्बल, म्याट्रेस, भाँडा सेट, महिला पुरुषका कपडा, बच्चाका कपडा, रुमाल, बाल्टी, डोरी, डिग्नी किट, हाइजेनिक किट, हेल्थ किट, झुलसँगै पानी सुद्धिकरण गर्ने क्लोरिन ट्याबलेटलगायत रहेका छन । राहत सामग्री वितरण गरिएका परिवारलाई घर मर्मत गर्न, काँटा किलाको व्यवस्था गर्न र शौचालय मर्मतका लागि नगद रकम समेत बैंक खातामार्फत उपलब्ध गराइएको रेडक्रस सोसाइटी कञ्चनपुर शाखाका कोषाध्यक्ष भट्टले जानकारी दिए ।
“भदौ १३ गते आएको बाढीबाट प्रभावित भएका परिवारलाई राहत सामग्री उपलव्ध गराएका छौं” उनले भने,“जिल्लाका बाढीबाट प्रभावित भएका २७८ परिवारको अनुसन्धान गरी त्यसबाट छनोट गरिएका १५० परिवारलाई राहत सामग्रीका लागि छनोट गरेका छौं । छनोटमा परेका परिवारलाई राहत सामग्री उपलब्ध गराएका छौं ।”
यही कात्तिक महिनाको पहिलो साता आएको बाढीबाट प्रभावित तत्काल राहत उपलव्ध गराउनुपर्ने २५० दोधारा चाँदनी र भीमदत्त नगरपालिकाका परिवारलाई गैरखाद्य, स्वास्थ्य, सरसफाइ सामग्री समेत रेडक्रसले वितरण गरेको छ । “बेमौसमी वर्षाबाट प्रभावित परिवारको विवरण सङ्कलन गर्ने कार्य भइरहेको छ” उनले भने, “विवरण सङ्कलन भइसकेपछि राहत वितरणको अगाडि बढाइने छ ।”
कार्यविधि संवाददाता । १७ कार्तिक २०७८, बुधबार १३:२४ बजे