सामान्य प्रशासन मन्त्रालयले पाँचौ तहका स्थानीय कर्मचारी सव–इन्जिनियर निलम बुढालाई सुर्खेत वीरेन्द्रनगर नगरपालिकामा सरुवा गरेपनि हाजिर गर्न नदिएको ७७ दिन पुगेको छ ।
वीरेन्द्रनगरका मेयर देव कुमार सुवेदीले सरुवा भएर आएका कर्मचारीलाई बजेट र दरबन्दी छैन भन्दै हाजिर गर्न नदिएको बुढाले बताइन् ।
सरुवा गर्दा सहमति दिने अहिले विभिन्न कारण देखाइ हाजिर गराउन सकिन्न भनेर चेतावनी दिएको उनको भनाई छ ।
यस अघि बुढा सुर्खेत जिल्लाकै बराहताल गाउँपालिकामा सव–इन्जिनियर पदमा कार्यरत थिइन् । गाउँपालिकाबाट बुढा गत मंसिर २६ गते सरुवा भएकी थिइन् ।
यस्तै हाजिर गर्न नपाएर ४ स्वास्थ्य सेवाका, २ प्रशासन सेवाका र ३ इन्जिनियर सेवाका सहित नौ नगरपालिकामा आउने र घर जाने गरेको नगरपालिका कर्मचारी स्रोतले जनाएको छ ।
नगरपालिकामा प्रमुख प्रशासकीय अधिकृत तीन महिनामा तीन जना फेरिएका छन् । हामी स्वास्थ्य सेवाका कर्मचारीले मासिक तलब नखाएको तीन महिना पुगेको नाम नभन्ने शर्तमा एक कार्यरत कर्मचारीले बताए ।
मेयर सुवेदी भन्छन्, ‘वि.स.२०७७ सालमा सामान्य प्रशासन मन्त्रालयलयसँग कर्मचारी माग गरेको हो । अहिले पदपूर्ति भइसकेपछि कर्मचारी आएका हुन्, नगरपालिकामा दरबन्दी छैन । बजेट छैन । त्यसैले हाजिर नगराएको हो ।’
कार्यविधि संवाददाता । १८ फाल्गुन २०७८, बुधबार २१:३५ बजे