चाडपर्व नजिकिँदै जाँदा सिट क्षमता भन्दा बढी यात्रु लिने सवारी साधनलाई जिल्ला ट्राफिक प्रहरी कार्यालय सुर्खेतले चेकजाँचमा कडाई गरेको छ ।
दशैं तिहार लक्षित विशेष सुरक्षा योजना अन्तर्गत कर्णाली भित्रिने सवारी दुर्घटना न्यूनिकरण गर्न सिट क्षमता भन्दा बढी यात्रु लिने सवारी साधन चेकजाँचलाई कडाई पारिएको जिल्ला ट्राफिक प्रहरी कार्यालयका प्रमुख उपेन्द्रप्रसाद आचार्यले जानकारी दिए ।
उनले कर्णाली प्रदेश प्रवेश गर्ने तथा बाहिरिने सवारी साधनको कागजात, क्षमता भन्दा बढी यात्रु बोक्ने, ओभरलोड, मापसे, यात्रुतानातान गर्ने, बढी भाडा असुल्ने जस्ता कार्यको चेकजाँच गरि सवारी दुर्घटना न्यूनिकरण गर्न कडाई गरिएको जनाए । ‘नेपालीहरुको चाड, दशैं, तिहार तथा छठ पर्वलाई लक्षित गरेर ट्राफिक व्यवस्थापन विशेष सुरक्षा योजना अन्तर्गत चेकजाँच कडाईलाई अघि बढाएका छौं,’ उनले भने, ‘ट्राफिक प्रहरीको अधिकतम् परिचालन, प्रभावकारी व्यवस्थापन, शीघ्र र सहज सेवा पहुँचको व्यवस्था मिलाएर चाडपर्वलाई सुरक्षित, मर्यादित र व्यवस्थित बनाउने उद्देश्यका साथ सवारी चेकजाँचमा कडाई गरेका हौं ।’ उनका अनुसार चेकजाँचका क्रममा ट्राफिक नियम विपरित सवारी साधान चलाउनेलाई कार्वाही गरिएको छ ।
कार्यविधि संवाददाता । २७ आश्विन २०७८, बुधबार १५:३७ बजे