कीर्तिपुरमा १२ वर्षीय बालकलाई ठक्कर दिएर भागेका मोटरसाइकल चालक दिपक घिसिङ पक्राउ परेका छन्।
शुक्रबार बिहान साढे ११ बजे मोटसाइकल चालक दिपक घिसिङलाई कीर्तिपुरबाटै पक्राउ गरेको जिल्ला प्रहरी परिसर काठमाडौंले जानकारी दिएको छ।
बिहीबार कीर्तिपुर नगरपालिका-१० ल्याब्रोरेटरी स्कुल अगाडि बिहान पौने १० बजे मोटरसाइकलले ठक्कर दिँदा सिन्धुली घर भई कीर्तिपुर-१० नयाँबजार बस्ने १२ वर्षीय सुजन मगरको मृत्यु भएको थियो।
उनलाई ठक्कर दिएर भागेका रामेछाप दोरम्वा शैलुङ गाउँपालिका- ६ घर भई काठमाडौं कालिमाटी बस्ने २६ वर्षीय दिपक घिसिङलाई बागमती प्रदेश ०२-०४२ प. ०२३९ नम्बरको मोटरसाइकल सहित प्रहरीले पक्राउ गरेको हो।
बिहीबार मोटरसाइकलले ठक्कर दिएपछि सुजन गम्भीर घाइते भएका थिए। उपचारका लागि उनलाई बल्खुस्थित बयोधा अस्पताल लगिएको थियो। त्यहाँ चिकित्सकले उनलाई मृत घोषणा गरेका थिए। अहिले सुजनको शव पोस्टमर्टमका लागि टिचिङ अस्पताल पठाइएको प्रहरी अधिकारीले बताएका छन्।
कार्यविधि संवाददाता । १९ आश्विन २०८०, शुक्रबार २१:४८ बजे